Sun, 20th April, 2014
Wednesday, 06 March 2013 11:08

အုပ်ချုပ်ရေးဆိုင်ရာ နည်းဥပဒေ အခန်း (၃)၊ ပုဒ်မ ၁၁ပါ ပြဋ္ဌာန်းချက် ဒီမိုကရေစီ စနစ်နှင့် ကိုက်ညီခြင်း မရှိ

Written by 

 

အယ်ဒီတာခင်ဗျား

ဖွဲ့စည်းပုံ အခြေခံဥပဒေ အခန်း (၁) နိုင်ငံတော်၏ အခြေခံမူများ ပုဒ်မ ၇ တွင် “နိုင်ငံတော်သည် စစ်မှန်၍ စည်းကမ်း ပြည့်ဝသော ပါတီစုံဒီမိုကရေစီ စနစ်ကို ကျင့်သုံးသည်” ဟု ပြဋ္ဌာန်း ထားပါသည်။ ဒီမိုကရေစီ စနစ်သည် ပြည်သူက ရွေးချယ်အုပ်ချုပ်သော စနစ်ဖြစ်ပါသည်။ ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဆိုင်ရာ နည်းဥပဒေ အခန်း (၃)၊ ပုဒ်မ ၁၁ တွင်ပါသည့် ပြဋ္ဌာန်းချက်သည် ဒီမိုကရေစီ စနစ်နှင့် ကိုက်ညီခြင်း မရှိပါ။

နည်းဥပဒေ ၁၁ ပါ ထိုပြဋ္ဌာန်းချက်မှာ မူရင်း ဥပဒေဖြစ်သည့် ပြည်ထောင်စု လွှတ်တော်မှ ပြဋ္ဌာန်းသည့် နိုင်ငံတော်သမ္မတက လက်မှတ်ရေးထိုး ထုတ်ပြန်သော ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေတွင် ပါဝင်ခြင်းမရှိပါ။ ပြည်ထဲရေး ဝန်ကြီးဌာနမှ ထုတ်ပြန်သော ရပ်ကွက် သို့မဟုတ် ကျေးရွာအုပ်စု အုပ်ချုပ်ရေး ဆိုင်ရာ နည်းဥပဒေတွင် ပါရှိပါသည်။

ရပ်ကွက် သို့မဟုတ် ကျေးရွာ အုပ်စုမှ ရွေးချယ် တင်ပြထားသော အုပ်ချုပ်ရေးမှူးသည် ဥပဒေပုဒ်မ (၅) ပါ အုပ်ချုပ်ရေးမှူး အရည် အချင်းမပြည့်စုံသဖြင့် ပယ်ဖျက်ခံရပြီး သက်ဆိုင်ရာ ကြီးကြပ်ရေးအဖွဲ့အား အမည်စာရင်း ထပ်မံ တင်ပြစေသည့်အခါ ပယ်ဖျက်ခြင်း ခံရသော အုပ်ချုပ်ရေးမှူး အတွက်သာ ပြန်လည် ရွေးချယ်သင့်ပါသည်။ သို့သော် နည်းဥပဒေ (၁၁) တွင် ပြဋ္ဌာန်းထား သည်မှာ “နည်းဥပဒေ ၆၊ ၇၊ ၈၊ ၉ နှင့် ၁၀ တို့နှင့် အညီ ဆောင်ရွက်ပြီး မြို့နယ် အုပ်ချုပ်ရေးမှူးထံ တင်ပြသည့် အခါ အထက်ပါ အတိုင်း ဆောင်ရွက်ရမည်” ဟု ပါရှိသဖြင့် ဆယ်အိမ်စု ကိုယ်စားလှယ် များကိုပါ ပြန်လည် ရွေးချယ်ရပါသည်။

ရွေးချယ်ပွဲ တစ်ခုတွင် ရွေးချယ်ခံရ သော အုပ်ချုပ်ရေးမှူး အရည်အချင်း ပျက်ယွင်းမှုကြောင့် ဥပဒေနှင့် အညီ ပြည်သူ့ဆန္ဒဖြင့် ရွေးချယ်ထားသည့် ဆယ်အိမ်စု ကိုယ်စားလှယ် များကို အကြောင်းမဲ့ ပယ်ဖျက်ခြင်းသည် ဖွဲ့စည်းပုံ အခြေခံဥပဒေ အခန်း (၁) ပုဒ်မ (၇) တွင် ပြဋ္ဌာန်းထားသည့် ဒီမိုကရေစီ စနစ်ကို ဆန့်ကျင်နေပါသည်။ ထို့အပြင် ဖွဲ့စည်းပုံ အခြေခံဥပဒေပုဒ်မ (၄၄၇) တွင် "တည်ဆဲ နည်းဥပဒေများ၊ စည်းကမ်းများ၊ အမိန့်ကြော်ငြာစာများ၊ အမိန့်များ၊ ညွှန်ကြားချက်များနှင့် လုပ်ထုံးလုပ်နည်း များကို ပြည်ထောင်စု အစိုးရက ပယ်ဖျက်ခြင်း၊ ပြင်ဆင်ခြင်း မပြုသေးမီ ဤဖွဲ့စည်းပုံ အခြေခံဥပဒေနှင့် မဆန့်ကျင်သမျှ အတည်ဖြစ်သည်" ဟု ပြဋ္ဌာန်း ထားပါသဖြင့် ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဆိုင်ရာ နည်းဥပဒေ (၁၁) သည် ပျက်ပြယ်သည့်သဘော သက်ရောက်နေပါသည်။

ထို့ကြောင့် နည်းဥပဒေ (၁၁) တွင် ပြဋ္ဌာန်းထားသည့် “နည်းဥပဒေ ၆၊ ၇၊ ၈၊ ၉ နှင့် ၁၀ တို့နှင့်အညီ” ဆိုသည့် စကားရပ်အစား “နည်းဥပဒေ ၈၊ ၉ နှင့် ၁၀ တို့နှင့်အညီ” ဟု ပြင်ဆင်သင့်ပါကြောင်း အကြံပြုအပ်ပါသည်။

ဦးတင်မောင်ဝင်း

Copyright © 2013 The Voice
All rights reserved
Powered by The Voice